Meksikanın qərbində turistləri aparan sərnişin avtobusu yoldan çıxaraq aşıb. Nəticədə azı 11 nəfər həyatını itirib, 16 nəfər isə ağır vəziyyətdə xəstəxanaya yerləşdirilib.
izmedia.az xəbər verir ki, hadisə Nayarit ştatının Amatlan-de-Kanjas bələdiyyəsində baş verib. “El-Manto” adlı məşhur təbii parka gedən turistləri daşıyan avtobus yüksək sürətlə hərəkət edərkən döngəni düzgün ala bilməyib və yoldan çıxaraq dərəyə aşıb.
Region baş prokurorluğunun məlumatına görə, 6 nəfər hadisə yerində ölüb, daha 5 nəfər isə xəstəxanaya çatdırıldıqdan sonra həyatını itirib. Yaralılardan ikisinin vəziyyətinin kritik olduğu bildirilir.
Qeyd edilib ki, bütün sərnişinlər qonşu Xalisko ştatının sakinləri olub. Hər iki ştatın rəhbərliyi hadisə ilə bağlı koordinasiya mərkəzi yaradaraq cəsədlərin daşınması, kompensasiya ödənişləri və ailələrə psixoloji dəstək göstərilməsi ilə məşğuldur.
İlkin ehtimala görə, qəza avtobus sürücüsünün idarəetməni itirməsi nəticəsində baş verib. Hazırda nəqliyyat vasitəsinin texniki vəziyyəti və sürücünün hadisə zamanı vəziyyəti (yorğunluq və ya sərxoşluq ehtimalı) araşdırılır.
Məlumat üçün bildirək ki, “El-Manto” bölgəsi şəlalələri və isti bulaqları ilə tanınan məşhur turizm məkanıdır, lakin həmin yol təhlükəli hesab olunur və tez-tez qəzalara səbəb olur.
Hadisə Meksika yollarında son iki ayda baş verən üçüncü böyük avtobus qəzası kimi qeydə alınıb. Yerli aktivistlər yolun tam yenilənməsini tələb etsələr də, hökumət hələlik yalnız araşdırmalar və nəzarətin gücləndiriləcəyini bildirir.
