Belqorod vilayətində daha bir Rusiya hava bombasının düşməsi ilə bağlı hadisə qeydə alınıb.
ASTRA nəşri Fövqəladə Hallar Nazirliyindəki mənbələrə istinadən bildirir ki, FAB-250 tipli sursat martın 12-də Belovskoye kəndi ərazisində “itkin düşüb”.
Məlumata görə, oxşar hadisə iki gün əvvəl Koroçanski rayonunun Zalomnoye kəndində də baş verib. Bundan əlavə, martın 7-də Qorodişe kəndi yaxınlığında hava bombası aşkarlanıb. Qeyd olunur ki, bu hadisələrin heç birində insan itkisi olmayıb.
ASTRA-nın hesablamalarına əsasən, 2026-cı ilin ilk aylarında Rusiya və Ukraynanın işğal olunmuş ərazilərində ən azı 20 belə hadisə baş verib. 2025-ci ildə bu rəqəm azı 143, 2024-cü ildə isə 165 olub.
Nəşr qeyd edir ki, Rusiya ordusu Sovet dövrünə aid FAB tipli hava bombalarını xüsusi UMPK modulları ilə təchiz edərək onları qanadlı və peyk vasitəsilə idarə olunan sursatlara çevirir. Bu sistemlər bombaların Rusiya ərazisindən buraxılmasına imkan versə də, texniki nasazlıqlar səbəbindən bəzən hədəfə çatmadan geri əraziyə düşə bilər.
Eyni zamanda, məlumatda bildirilir ki, bu cür hadisələrin bəzi hallarda rəsmi qurumlar tərəfindən ictimaiyyətdən gizlədilməsinə cəhd edilir. Mülki şəxslərin xəsarət aldığı bəzi hallarda isə səbəb kimi Ukrayna silahlı qüvvələrinin hücumları göstərilə bilər.
Rusiya Aerokosmik Qüvvələri ilə əlaqəli “Qırıcı Bomber” adlı mənbə də daha əvvəl sursatların düşməsi ilə bağlı oxşar halların baş verdiyini, o cümlədən Belqorod şəhəri yaxınlığında belə insidentlərin qeydə alındığını iddia edib.
İzmedia.az
