Çərşənbə günü ABŞ fond indeksləri yüksəlişlə qapanıb. İnvestorlar Yaxın Şərqdəki gərginliyi, onun inflyasiyaya və Federal Ehtiyat Sisteminin (FES) faiz qərarlarına təsirini qiymətləndirir, eyni zamanda əmək bazarı üzrə açıqlanacaq statistikaları gözləyirlər.
Ticarət sessiyasının nəticələrinə əsasən, Dow Jones indeksi 0,56% artaraq 53.061,95, S&P 500 0,46% artaraq 7666,6, Nasdaq Composite isə 0,45% artaraq 26.217,83 bəndə çatıb. Səhmləri 3,2% bahalaşan “Nvidia” ən çox qazandıran şirkətlərdən olub. Korporativ xəbərlər fonunda “Dell Technologies” 16%, “Brown-Forman” 3,9%, “Uber” 1,6%, “Chevron” 0,4% dəyər qazanıb. Güclü gəlirliyə baxmayaraq rüblük zərər açıqlayan “Palo Alto Networks”ün səhmləri isə 9,3% ucuzlaşıb.
ABŞ və İran arasında hərbi toqquşmaların kəskinləşməsi, o cümlədən Hörmüz boğazında tankerlərin minalarla toqquşması xəbərləri neft qiymətlərini son bir ayın ən yüksək səviyyəsinə qaldırıb. Bu vəziyyət inflyasiya təzyiqini artırdığından, FES-in sentyabr iclasında faiz dərəcəsini qaldırmaq ehtimalı 66%-ə yüksəlib. Eyni zamanda, “Bej Kitabı” hesabatı ölkə iqtisadiyyatında artımın zəifdən orta səviyyəyə qədər davam etdiyini göstərib.
İzmedia.az
